ദോഹ:കേരള സർക്കാരിന്റെ നോൺ-റെസിഡന്റ് കേരളൈറ്റ്സ് അഫയേഴ്സ് (നോർക്ക) വകുപ്പിന്റെ ആഭിമുഖ്യത്തിൽ നടന്ന ആദ്യ നോർക്ക പ്രൊഫഷണൽ ആൻഡ് ബിസിനസ് ലീഡർഷിപ്പ് മീറ്റിൽ ഖത്തറിൽ നിന്നുള്ള മൂന്ന്പ്രതിനിധികളുടെവികസനരേഖ കൈയ്യടി നേടി.പ്രവാസി സമൂഹത്തിന്റെ ബൗദ്ധികവും സാമ്പത്തികവുമായ പങ്കാളിത്തത്തെ കേരളത്തിന്റെ വളർച്ചാ ദൗത്യവുമായി ബന്ധിപ്പിക്കാനുള്ള  ചരിത്രപരമായ ഒരു വഴിത്തിരിവായി മാറിനോർക്ക പ്രൊഫഷണൽ ആൻഡ് ബിസിനസ് ലീഡർഷിപ്പ് മീറ്റ്.
ഖത്തറിൽ നിന്നുള്ള ഐ.ബി.പി.സി ഖത്തർ പ്രസിഡന്റും ഹാർവാർഡ് ബിസിനസ് സ്കൂൾ ക്ലബ് ഓഫ് ജിസിസി സെക്രട്ടറിയുമായ താഹ മുഹമ്മദ് അബ്ദുൾ കരീം, ബയോടെക് മെഡ്കാൽ സിഇഒ സമീർ അബ്ദുള്ള, ORYX GTL ലീഡ് എഞ്ചിനീയർ നിധിൻ ഓതേരി എന്നിവർ അവതരിപ്പിച്ച നിർദ്ദേശങ്ങളാണ് ശ്രദ്ധേയമായത്.
മുഖ്യമന്ത്രി പിണറായി വിജയൻ, മന്ത്രിമാർ, ഉന്നത ഉദ്യോഗസ്ഥർ എന്നിവർ പങ്കെടുത്ത മീറ്റ്, ലോകമെമ്പാടുമുള്ള 50-ലധികം മലയാളികളെ ഒന്നിപ്പിച്ചു. കേരളത്തിന്റെ വികസനത്തിന് ആഗോള അറിവും പരിചയസമ്പത്തും പ്രയോജനപ്പെടുത്താനുള്ള ദിശാബോധം സമ്മേളനം സമ്മാനിച്ചു.
താഹ മുഹമ്മദ് അവതരിപ്പിച്ച “കേരളത്തിന്റെ ഭാവിയെ ശാക്തീകരിക്കൽ” എന്ന പ്രമേയം ആറു സ്തംഭങ്ങളിലൂടെയും മൂന്ന് തലങ്ങളിലൂടെയും പ്രാവർത്തികമാക്കാവുന്ന പഠന-നൈപുണ്യ മാതൃകയെ നിർദ്ദേശിക്കുന്നു.
ആജീവനാന്ത പഠനം, ആഗോള യോഗ്യതകൾ, പ്രവാസി മെന്റർഷിപ്പ്, തത്സമയ തൊഴിൽ ഡാറ്റ തുടങ്ങിയ ഘടകങ്ങൾ ഉൾപ്പെടുത്തി വിദ്യാഭ്യാസത്തിൽ ആഗോള നിലവാരം സൃഷ്ടിക്കുന്നതാണിത്. ആരോഗ്യസംരക്ഷണം, ലൈഫ് സയൻസസ്: ഡയഗ്നോസ്റ്റിക്സിന്റെ ആഗോള ഹബ്
ദോഹയിലെ ബയോടെക് മെഡ്കാൽ സിഇഒ സമീർ അബ്ദുള്ള കേരളത്തെ നൂതന ഡയഗ്നോസ്റ്റിക് കിറ്റുകളുടെ തദ്ദേശീയ നിർമ്മാണ കേന്ദ്രമാക്കി മാറ്റാനും, AI അധിഷ്ഠിത ആരോഗ്യ ഡാറ്റാ ഇക്കോസിസ്റ്റം രൂപപ്പെടുത്താനും നിർദ്ദേശിച്ചു. ഇതിലൂടെ ഇറക്കുമതി ആശ്രിതത്വം കുറയുകയും ആരോഗ്യപരമായ സ്വയംപര്യാപ്തത വർധിക്കുകയുമാകും.
 സുസ്ഥിരതയും പുതിയ ഊർജ്ജവും: ഹരിത വിപ്ലവത്തിന് ഖത്തർ മാതൃകയായി ORYX GTL-ൽ ലീഡ് പ്ലാനിംഗ് എഞ്ചിനീയറായ നിധിൻ ഓതേരി വയനാട്ടിൽ ബയോ-CNG, ബയോ-ഹൈഡ്രജൻ പ്രോജക്റ്റ് തുടങ്ങാനുള്ള പദ്ധതി അവതരിപ്പിച്ചു. മാലിന്യ സംസ്കരണത്തെയും കാർബൺ കുറയ്ക്കലിനെയും ബന്ധിപ്പിച്ച് സർക്കുലർ ഇക്കോണമി ലക്ഷ്യങ്ങൾ പ്രാവർത്തികമാക്കുകയാണ് ലക്ഷ്യം.മിഡിൽ ഈസ്റ്റ്, യൂറോപ്പ്, അമേരിക്ക, ഏഷ്യ-പസഫിക് എന്നിവിടങ്ങളിൽ നിന്നുള്ള 50-ലധികം ആഗോള മലയാളി നേതാക്കൾ പങ്കെടുത്ത ഈ മീറ്റിലൂടെ, പ്രവാസികളുടെ ബൗദ്ധിക വൈദഗ്ധ്യവും കേരളത്തിന്റെ ഭാവി വികസന ദൗത്യവും ചേർന്ന് ഒരു പുതിയ കാഴ്ചപ്പാട് സൃഷ്ടിച്ചു.
ഖത്തർ മലയാളി പ്രതിനിധികളുടെ നിർദ്ദേശങ്ങൾ നോർക്ക മീറ്റിൽ കേരളത്തിന്റെ വിദ്യാഭ്യാസം, ആരോഗ്യം, ഊർജ്ജം എന്നീ പ്രധാന മേഖലകളുടെ ഭാവി രൂപപ്പെടുത്തുന്നതിൽ വഴികാട്ടിയായി.
പ്രവാസികളുടെ ബൗദ്ധികവും സാമ്പത്തികവുമായ പങ്കാളിത്തം കേരളത്തിന്റെ വികസനത്തിന് ആഗോള എഞ്ചിനായി മാറുന്നതാണ്നോർക്ക പ്രൊഫഷണൽ ആൻഡ് ബിസിനസ് ലീഡർഷിപ്പ് മീറ്റ്.